Rannsókn lögreglu á hvarfi Sean Bradley árið 2018 fór fljótt að snúast um rannsókn á aðal vitninu í málinu. Konunni sem hann var talinn hafa farið með úr landi. Konan á sér sögu sem gerði það að verkum að vinir Sean gátu ekki treyst henni. Nokkru áður en Sean hvarf hafði hann fengið fúlgur fjár í arf frá ættingjum á Írlandi. Rannsóknin lögreglu sneri meðal annars að því hvort einhver hefði verið á eftir peningunum hans. Hvarf hans er enn óupplýst. Viðmælendur: Alexandra Melanie Davíðsdóttir, Rúnar Þór Steingrímsson og Guðbergur Guðbergsson. Umsjón: Þóra Tómadóttir

Finnur Björn Harðarson, leigutaki laxveiðiárinnar Stóru-Laxár í Hreppum á Suðurlandi, hefur átt í hörðum og persónulegum deilum við eigendur jarðarinnar Iðu síðastliðin ár. Hann vænir fólkið sem á Iðu um stórfellt, óþarfa laxadráp í ármótum Stóru-Laxár og Hvítar sem skemmi fyrir laxgegnd og hrygningu í Stóru-Láxá. Eigendur Iðu væna Finn hins vegar um eignaspjöll og ólögmæta umgengni um land þeirra og staðhæfa að hann fari offari í persónuárásum gegn þeim. Deilan er komin til lögreglu og lögmanna og sér hvergi fyrir endann á hendi. Eitt af því sem deilt er um er hvar ós Stóru-Laxár hefjist og þar af leiðandi hvar eigendur Iðu megi veiða og hvar ekki. Rætt er við Finn Harðarson, Oddfríði Helgadóttur, sem er einn af landeigendum Iðu, og Guðmund Ágústsson, sem er lögfræðingur eigenda Iðu. Umsjón: Ingi Freyr Vilhjálmsson Lag: Tómas R. Einarsson af plötunni Streng

Írski fiðluleikarinn Sean Bradley hvarf sporlaust frá Íslandi árið 2018. Hvarf hans er ráðgáta sem lögreglu hefur ekki enn tekist að upplýsa. Mikilvægasti upplýsingagjafi lögreglunnar um málið er konan sem síðast sá hann á lífi. Hún er talin hafa farið með honum til Spánar. Leit okkar að Sean Bradley fer hins vegar fljótt að breytast í leitina að konunni. Þessi þáttur fjallar um hana og hvers vegna lögregla beindi sjónum sínum sérstaklega að henni við rannsókn málsins. Konan á sér athyglisverða sögu. Umsjón: Þóra Tómasdóttir. Viðmælendur: Anna Maguire og Rúnar Þór Steingrímsson.

Í þættinum er rætt við tvær konur sem telja sig heppnar að hafa fengið inni hjá leigufélaginu Bjargi. Þær segja það hafa gjörbreytt stöðu þeirra og skapað þeim öryggi sem þær hafa ekki fundið fyrir á húsnæðismarkaðnum áður. Umsjón: Bergsteinn Sigurðsson

Six Rivers, fyrirtæki enska milljarðamæringsins Jim Ratcliffe, er með sex laxveiðiár á Norðausturlandi. Fyrirtækið hefur áhuga á að minnsta kosti fjórum ám til viðbótar. Þetta eru Laxá í Aðaldal, Svalbarðsá, Sandá og Ormarsá. Jim Ratcliffe er í hópi ríkustu manna heims og er hann hvað þekktastur fyrir eignarhald sitt á enska knattspyrnufélaginu Manchester United. Rætt er við framkvæmdastjóra Six Rivers, Gísla Ásgeirsson, um fyrirtækið og framtíðaráform þess. Umsjón: Ingi Freyr Vilhjálmsson

Írski fiðluleikarinn Sean Bradley heillaði stjórnendur Sinfóníuhljómsveitar Íslands með leik sínum og hreppti fasta stöðu í sveitinni á níunda áratugnum. Hann lék með Sinfó í rúman áratug og kenndi við tónlistarskóla víða um landið. Árið 2018 hvarf hann sporlaust. Þá virðist hann hafa flogið til Spánar með konu sem leigði af honum íbúð. Vinir Sean vantreysta konunni og kalla eftir svörum um hvað varð um hann. Við heyrum af rannsókn lögreglunnar á Suðurlandi og ræðum við nokkra vini Sean. Umsjón: Þóra Tómasdóttir

Hrossabóndinn Ragnheiður Þorgrímsdóttir, bóndi á Kúludalsá í Hvalfirði, hefur staðið í stappi við álfyrirtækið Norðurál sem rekur álverið á Grundartanga í Hvalfirði. Ragnheiður hefur í 18 ár haldið því fram að hrossinn hennar hafi hennar veikst vegna flúormengunar frá álverinu. Hún hefur þurft að láta lóga hrossunum vegna þessarar meintu mengunar. Hrossinn sem hún hefur þurft að láta lóga eru meira en 20 talsins. Fjallað er um sögu Ragnheiðar og þessa baráttu hennar í heimildarmyndinni Bóndinn og verksmiðjan. Fyrr í júní hlaut myndin verðlaun á heimildarmyndahátíð Skjaldborg á Patreksfirði. Hrafnhildur Gunnarsdóttir gerir myndina ásamt Barða Guðmundssyni. Rætt er við Hrafnhildi um baráttu Ragnheiðar og heimildarmyndina. Umsjón: Ingi Freyr Vilhjálmsson

Viðar Guðjohnsen er stórtækur leigusali 56 stúdííóíbúða og herbergja í fasteign sem hann á í Reykjavík. Viðar var tiltölulega lítt þekktur í samfélaginu þar til árið 2018 en þá bauð hann sig fram í leiðtogakjöri hjá Sjálfstæðisflokknum fyrir borgarastjórnarkosningar. Viðar lýsir því hvernig það kom til að hann byggði húsið sem hann í Mörkinni 8 með þessum íbúðum og herbergjum fyrir meira en þremur áratugum síðan. Húsnæðið er skilgreint sem gistiheimili samkvæmt fasteignamati. Í því eru aðallega litlar stúdíóíbúðir. Talsverð umræða hefur verið útleigu á litlum íbúðum og herbergjum á höfuðborgarsvæðinu og aðstæður erlends verkafólks á leigumarkaði eftir brunann mannskæða á Hjarðarhaga fyrir nokkrum vikum. Í sumum tilfellum er búið að breyta húsnæðinu án tilskilinna leyfa þannig að brunavörnum er ábótavant í því. Rætt er við Viðar Guðjohnsen um reynslu hans af því að vera stórtækur leigusali í Reykjavík. Umsjón: Ingi Freyr Vilhjálmsson

Talið er að amk 6000 manns glími við heilabilun á Íslandi. Því þykir fagnaðarefni að lyfið Leqembi hafi fengið markaðsleyfi hér á landi. Lyfið er sagt það fyrsta sem virðist hafa áhrif á undirliggjandi ferli Alzheimer-sjúkdómsins. Öldrunarlæknar tala um tímamót í meðhöndlun við þessa erfiða sjúkdóms. Viðmælendur: Helga Eyjólfsdóttir yfirlæknir minnismóttökunnar og öldrunarlæknirinn Steinunn Þórðardóttir. Umsjón: Þóra Tómasdóttir. Endurflutningur frá 25. apríl 2025.

Fjórir lífeyrissjóðir eru meðal 20 stærstu hluthafa flugfélagsins Play sem nú stendur á tímamótum eftir að greint var frá yfirtökutilboði tveggja hluthafa félagsins í vikunni. Þessi hluthafar eru forstjórinn Einar Örn Ólafsson og Elías Skúli Skúlason, sem er varaformaður stjórnar. Hluthafar Play munu tapa miklum peningum ef líkum lætur. Hluthöfum Play stendur til boða að ganga að yfirtökutilboðinu eða að halda áfram að vera hluthafar í flugfélaginu með þeim Einari Erni og Elíasi Skúla. Ólafur hjá Birtu segir að sjóðurinn hafi ekki tekið ákvörðun um hvorn kostinn sjóðurinn muni velja. Hvernig túlkar Jón Karl Ólafsson, sem er fyrrverandi forstjóri Icelandair og fyrrverandi eigandi flugfélagsins Primera Air, þessa stöðu Play?Jón Karl undirstrikar því að kostir hluthafa Play í stöðunni hafi verið þrír: Að leggja félaginu til nýtt hlutafé, að gefa félagið upp til gjaldþrotaskipta á Íslandi eða að fara þessa leið. Umsjón: Ingi Freyr Vilhjálmsson

Hjúkrunarfræðingurinn Herdís Storgaard segir í nýjum tilmælum á Heilsuveru að foreldrar eigi ekki að láta börn sín sofa úti í vagni. Þeir eigi að henda gömlu bastvöggunum frá Blindrafélaginu og alls ekki nota hin svokölluðu hreiður í svefnumhverfi barna. Þóra Tómasdóttir talaði við hana.

Slökkviliðið má fara inn í íbúðarhúsnæði þar sem grunur leikur á að brunavarnir séu í ólagi. Þetta er niðurstaða úrskurðar Héraðsdóms Reykjavíkur frá því í lok apríl. Landsréttur staðfesti þessa niðurstöðu í byrjun maí. Úrskurðurinn á rætur sínar að rekja til þess að slökkvilið höfuðborgarsvæðisins fékk ábendingu frá lögreglunni um að brunavörnum kynni að vera ábótavant í húsi í Katrínartúni í Reykjavík. Þetta hús er í eigu föður Davíðs Viðarssonar, eða Quang Le, sem verið hefur til rannsóknar vegna gruns um að hann hafi stundað vinnumansal, peningaþvætti og skipulagða glæpastarfsemi á meðal annars Wok On veitingastöðunum. Svo virðist sem húsið í Katrínartúni hafi verið notað í í hinni meintu brotastarfsemi. Þar bjó fólk í risi sem ekki var heimilað til búsetu. Rætt er við Jón Viðar Matthíasson slökkviliðsstjóri á höfuðborgarsvæðinu um þýðingu úrskurðarins. Umsjón: Ingi Freyr Vilhjálmsson

Í gær var stór stund í lífi rúmlega tvö hundruð fjölskyldna sem upplifðu hörmungar þegar olíuborpallurinn Alexander Kielland hrundi í Norðursjó, árið 1980. 45 árum síðar samþykkti norska Stórþingið að greiða ætti bætur til þeirra sem upplifðu eða misstu ástvin í þessu mannskæðasta vinnuslysi í sögu Noregs. Meðal þeirra sem létust var Íslendingurinn Hans Herbert Hansen. Hann var 33 ára Akureyringur, og skildi eftir sig þrjú ung börn á Íslandi. Elsta dóttir hans, Guðný Hansen, hefur í heilan áratug barist fyrir uppgjöri málsins. Þóra Tómasdóttir ræddi við hana og þingmanninn Mími Kristjánsson.

Hjón á miðjum aldri lýsa því hvernig það hefur verið að búa undir herbergjahóteli í miðbæ Reykjavíkur í tæpan áratug. Blaðamaður Þetta helst heimsótti konuna og eiginmann hennar í íbúðina þeirra. Í húsinu með þeim búa 7 til 8 einstaklingar í litlum herbergjum. Leigusali þeirra er fyrirtækið 101 house sem sérhæfir sig í útleigu á herbergjum í póstnúmeri 101 í Reykjavík. Eigandi fyrirtækisins er Indriði Björnsson, sextugur karlmaður sem búsettur er í Reykjavík. Fyrirtæki hans á ellefu fasteignir í Reykjavík og eru herbergi þess auglýst á heimasíðu félagsins. Konan lýsir alls konar slæmum afleiðingum af því að búa undir herbergjahóteli þar sem svo margir ótengdir aðilar búa. Hún nefnir hávaða og umgang og svo líka skort á viðhaldi á eigninni þar sem leigusalinn vill ekki leggja í óþarfa kostnað. Talsverð umræða hefur verið í samfélaginu um slík herbergjahótel sem oft og tíðum eru rekin í fjölbýlishúsum þar sem einstaklingar og fjölskyldur búa í leigu- eða eignarhúsnæði. Þessi umræða hefur komið upp í kjölfar brunans í íbúð á Hjarðarhaga í þar síðustu viku. Umsjón: Ingi Freyr Vilhjálmsson

Fyrir hálfum mánuði réðst Inga Sæland með sleggju á veggi í hinni sögufrægu byggingu Loftleiða í Reykjavík.Tilgangurinn með hamaganginum í ráðherranum var að vekja athygli á því að ríkið hefði komist að samkomulagi við fasteignafélagið Reiti um að húsnæðinu yrði breytt í hjúkrunarrými. Ráðast á í gangerar endurbætur á húsinu svo það geti svalað brotabrot af þörf þjóðarinnar fyrir hjúkrunarrými. Í þessum þætti ætlum við að banka uppá á vinnusvæðinu og skoða hvernig fasteignafélaginu gengur að breyta skrifstofum í hjúkrunarheimili. Við hittum þar fyrir Birgir Þór Birgisson, framkvæmdastjóra þróunar hjá Reitum. Við heyrum líka Halldóri Eiríkssyni arkitekt hjá Tark, sem hefur komið að ýmsum breytingum á húsinu, svo sem því að bæta heilli hæð ofan á það. Umsjón: Þóra Tómasdóttir

Um helgina var haldið grásleppublót á Bakkafirði Í Langanesbyggð á norðausturlandi. Þar var þessi kynlega fisktegund heiðruð með hátíðahöldum og fjölbreyttri dagskrá. Boðið var upp á siglingu í grásleppubáti. Gestir fengu frumlega rétti sem búnir eru til úr þessum fiski. Frumsýnd var heimildarmynd um grásleppuveiðar eftir Rut Sigurðardóttur. Börnin fengu að handleika og skella kossi á lifandi grásleppur sem höfðu verið veiddar daginn áður. Og síðast en ekki síst seldu skipuleggejdnur hátíðarinnar vörur sem merktar eru grásleppunni, meðal annars svuntur með útlínum þessarar belgmiklu kynjaveru. Blaðamaður Þetta helst var á Grásleppunni, eins og gillið heitir, og kynnti sér hátíðahöldin með viðtölum við aðstandendur þeirra. Umsjón: Ingi Freyr Vilhjálmsson

Bruninn á Hjarðarhaga í síðustu viku hefur enn og aftur vakið upp umræðu um stöðu erlends verkafólks á íslenskum leigumarkaði sem býr í herbergjahótelum. Með herbergjahótelum er átt við fasteignir þar sem fólk sem er ótengt býr í herbergjum og deilur eldhúsaðstöðu og salerni. Einn þeirra sem er orðinn stórtækur á þessum leigumarkaði með herbergi er veðufræðingurinn og prófessorinn Haraldur Ólafsson. Haraldur á 10 íbúðir í Reykjavík í tveimur einkahlutafélögum og hafa margir ótengdir einstaklingar búið í hluta þessara eigna um árabil. Einkahlutafélögin heita Mótel Venus ehf. og Miklabraut ehf. Rætt er við Harald og Þórunni Grétu Sigurðardóttur sem er býr í götu þar sem ein af fasteignum hans er staðsett. Umsjón: Ingi F. Vilhjálmsson

Mörg spjót standa á Guðrúnu Hafsteinsdóttur formanni Sjálfstæðisflokksins þessa dagana. Hún er gagnrýnd fyrir að vera ekki búin að hífa upp fylgi flokksins og vera ósýnileg í umræðu um veiðigjöld. Við heimsækjum Guðrúnu á formannsskrifstofu hennar í Valhöll og heyrum hvernig hún hyggst tækla verkefnin og lægja öldur eftir klofning flokksins á síðasta landsfundi hans. Umsjón: Þóra Tómasdóttir

Bruninn á Hjarðarhaga í síðustu viku hefur vakið mikla athygli og er til rannsóknar hjá lögreglu. Fjórir menn bjuggu saman í íbúðinni sem er 80 fermetrar að stærð og með þremur herbergjum, samkvæmt fasteignamati. Þeir voru allir að erlendu bergi brotnir. Einn Bandaríkjamaður, einn Tékki og tveir Ungverjar. Þeir tengdust ekki innbyrðis. Búið var að stúka af hluta íbúðarinnar til að búa til fleiri lokuð rými fyrir leigjendurna. Tveir af mönnunum létust í brunanum og sá þriðji særðist alvarlega. Hann komst við illan leik út um glugga á íbúðinni. Fjórði maðurinn var ekki heima þegar þessi harmleikur átti sér stað. Í þetta helst í dag er rætt við Guðmund Hrafn Arngrímsson, formann leigjendasamtakanna, og Sögu Kjartansdóttur hjá ASÍ um þetta búsetufyrirkomulag margra erlendra verkamanna hér á landi, hversu algengt það er og hvaða vandkvæði fylgja því. Guðmundur Hrafn kallar þetta búsetuform herbergjahótel. Umsjón: Ingi Freyr Vilhjálmsson